ଉତ୍ତର କୋରିଆ ଦାବି କରିଛି ଯେ କରୋନା ଜୀବାଣୁ ସଂକ୍ରମଣର କୌଣସି ବ୍ୟକ୍ତି ଶିକାର ହୋଇ ନାହାଁନ୍ତି । ଏହି ଦାବି ଉପରେ ଏବେ ସନ୍ଦେହ ବଢ଼ିବାରେ ଲାଗିଛି ଏବଂ ପ୍ରଶ୍ନ ମଧ୍ୟ ଉଠିଛି । ଅବଶ୍ୟ ସଂକ୍ରମଣ ବିସ୍ତାର ନକରିବା ପାଇଁ ଉତ୍ତର କୋରିଆ ଏହାର ସୀମା ବନ୍ଦ କରିବା ଭଳି କଠୋର ନିଷ୍ପତ୍ତି ଗ୍ରହଣ କରିଛି । ଦକ୍ଷିଣ କୋରିଆରେ କିନ୍ତୁ ଆମେରିକାର ସୌନ୍ୟବାହିନୀର ବରିଷ୍ଠ କମାଣ୍ଡର ଉତ୍ତର କୋରିଆର ଦାବିକୁ ‘ମିଥ୍ୟା’ ଏବଂ ‘ଅସମ୍ଭବ’ ବୋଲି କହିଛନ୍ତି ।
ଯଦିଓ ଉତ୍ତର କୋରିଆର ଜଣେ ବିଶେଷଜ୍ଞ ଗଣମାଧ୍ୟମକୁ କହିଛନ୍ତି ଯେ ସେଠାରେ ସଂକ୍ରମଣ ମାମଲାକୁ ଏଡ଼ାଇ ଦିଆଯାଇପାରିବ ନାହିଁ, ମାତ୍ର ବ୍ୟାପକ ସଂକ୍ରମଣ ହେବାର ସମ୍ଭାବନା କମ୍ । ଜନ୍ ହପକିନ୍ସ ବିଶ୍ୱବିଦ୍ୟାଳୟର ପରିସଂଖ୍ୟାନ ଅନୁଯାୟୀ, ବର୍ତ୍ତମାନ ବିଶ୍ୱରେ 1 ମିଲିୟନରୁ ଅଧିକ କରୋନା ଜୀବାଣୁ ସଂକ୍ରମଣ ଏବଂ ମୃତ୍ୟୁ ସଂଖ୍ୟା ଦିନକୁ ଦିନ ନୂଆ ନୂଆ ରେକର୍ଡ ପାର୍ କରୁଛି ।
ଉତ୍ତର କୋରିଆର ସେଣ୍ଟ୍ରାଲ୍ ଆଣ୍ଟି-ଏପିଡେମିକ୍ ମୁଖ୍ୟାଳୟର ନିର୍ଦ୍ଦେଶକ ପାକ୍ ମାୟୋଙ୍ଗ-ସୋ ଶୁକ୍ରବାର ଦିନ ନ୍ୟୁଜ୍ ଏଜେନ୍ସି AFP କୁ କହିଛନ୍ତି ଯେ ଉତ୍ତର କୋରିଆର କୌଣସି ବ୍ୟକ୍ତି ଏପର୍ଯ୍ୟନ୍ତ କରୋନା ଜୀବାଣୁ ସଂକ୍ରମିତ ହୋଇନାହାଁନ୍ତି ।
ସେ କହିଛନ୍ତି, “ସଂକ୍ରମଣକୁ ରୋକିବା ପାଇଁ ଆମେ ପୂର୍ବରୁ ସକ୍ରିୟ ଏବଂ ବୈଜ୍ଞାନିକ ପଦକ୍ଷେପ ନେଇଛୁ । ଯେପରିକି ବିଦେଶରୁ ଲୋକଙ୍କୁ ଖୋଜିବା ଏବଂ ସେମାନଙ୍କୁ କ୍ୱାରେଣ୍ଟିନରେ ରଖିବା ଇତ୍ୟାଦି । ଆମେ ସମସ୍ତ ସାମଗ୍ରୀ, ଆମର ସମସ୍ତ ଜଳ, ସ୍ଥଳ ଏବଂ ବାୟୁ ସୀମାକୁ ସଂପୂର୍ଣ୍ଣ ପରିମଳ କରିଛୁ । ଦକ୍ଷିଣ କୋରିଆରେ ଥିବା ଆମେରିକୀୟ ସେନାର କମାଣ୍ଡର ଜେନେରାଲ ରବର୍ଟ ଆବ୍ରାମସ୍ ଉତ୍ତର କୋରିଆର ଏହି ଦାବିକୁ କିନ୍ତୁ ଅସ୍ୱୀକାର କରିଛନ୍ତି ।”
ସିଏନ୍ଏ ଏବଂ ଭଏସ୍ ଅଫ୍ ଆମେରିକାର ମିଳିତ ସାକ୍ଷାତକାରରେ ସେ କହିଛନ୍ତି ଯେ ଆମେ ପାଇଥିବା ତଥ୍ୟରୁ ମୁଁ ଆପଣଙ୍କୁ କହିପାରେ ଯେ ଏହା ଏକ ଅସମ୍ଭବ ଦାବି । ତେବେ ଉତ୍ତର କୋରିଆରେ କେତେ ମାମଲା ଅଛି ସେ ନିଶ୍ଚିତ ଭାବରେ କହିପାରିବେ ନାହିଁ ବୋଲି ମଧ୍ୟ କହିଛନ୍ତି ।
ଆମେରିକାର ୱେବସାଇଟ୍ NK ନ୍ୟୁଜ୍ ର ପରିଚାଳନା ସମ୍ପାଦକ ଅଲିଭ୍ ହୋଟମ୍ ମଧ୍ୟ ବିଶ୍ୱାସ କରନ୍ତି ଯେ ଉତ୍ତର କୋରିଆରେ ସଂକ୍ରମଣର ଘଟଣା ଅଛି । ସେ କହିଛନ୍ତି, “ଦକ୍ଷିଣ କୋରିଆ ଏବଂ ଚୀନ୍ ସୀମାବର୍ତ୍ତୀ ହୋଇଥିବାରୁ ଉତ୍ତର କୋରିଆରେ କୌଣସି ସଂକ୍ରମଣ ହେବାର ସମ୍ଭାବନା ନାହିଁ ବୋଲି ଆଶା କରାଯାଉଛି ।
ଏଥିସହ ସେ ଏହା ମଧ୍ୟ କହିଛନ୍ତି ଯେ ଉତ୍ତର କୋରିଆରେ ସଂକ୍ରମଣର ବ୍ୟାପକ ବିସ୍ତାର ହୋଇଛି, ଏହାର ସମ୍ଭାବନା କମ୍ ।
ଏଥିରେ କୌଣସି ସନ୍ଦେହ ନାହିଁ ଯେ ଉତ୍ତର କୋରିଆ ଅନ୍ୟାନ୍ୟ ଦେଶ ଅପେକ୍ଷା କରୋନା ଜୀବାଣୁ ସଂକ୍ରମଣ ବିରୋଧରେ ଅଧିକ ତ୍ୱରିତ ଏବଂ ପ୍ରଭାବଶାଳୀ ପଦକ୍ଷେପ ନେଇଛି । ଜାନୁଆରୀ ଶେଷରେ ଏହା ଏହାର ସୀମାକୁ ସିଲ୍ କରିଥିଲା ଏବଂ ପରେ ପ୍ୟୋଙ୍ଗୟାଙ୍ଗକୁ ଆସୁଥିବା ଶହ ଶହ ବିଦେଶୀଙ୍କୁ କ୍ୱାରେଣ୍ଟିନରେ ରଖିଥିଲା । ସେହି ସମୟରେ ଚାଇନାରେ ସଂକ୍ରମଣ ଅତି ଦ୍ରୁତ ଗତିରେ ବଢୁଥିଲା ।
NK ନ୍ୟୁଜ୍ ରିପୋର୍ଟ କରିଛି ଯେ ଉତ୍ତର କୋରିଆ ଏହାର 10,000 ନାଗରିକଙ୍କୁ ଅଲଗା କରିଦେଇଛି ଏବଂ 500 ଲୋକ ଏବେବି କ୍ୱାରେଣ୍ଟାଇନ ବା ପୃଥକବାସରେ ରହିଛନ୍ତି । ଉତ୍ତର କୋରିଆ ଉପରେ ପ୍ରତିବନ୍ଧକ ଥିବାରୁ ନୂତନ ଚିକିତ୍ସା ଉପକରଣ କିଣିବା ତାଙ୍କ ପାଇଁ କଷ୍ଟକର । ଅଲିଭ୍ ହୋଟମ୍ ଏହା ମଧ୍ୟ କହିଛନ୍ତି ଯେ ସହରାଞ୍ଚଳରେ ଉନ୍ନତ ସ୍ୱାସ୍ଥ୍ୟ ସୁବିଧା ଅଛି, କିନ୍ତୁ ଗ୍ରାମାଞ୍ଚଳରେ ରହୁଥିବା ଲୋକଙ୍କ ପାଇଁ ଏହି ସୁବିଧା ପାଇବା ଅପେକ୍ଷାକୃତ କଷ୍ଟକର । ସେ କହିଛନ୍ତି, “କେତେକ ଅଞ୍ଚଳର ଡାକ୍ତରଖାନାରେ ଅର୍ଥର ଅଭାବ ରହିଛି । ସେଠାରେ ଡାକ୍ତରଖାନାଗୁଡ଼ିକରେ ଜଳ ଯୋଗାଣ କିମ୍ବା ବିଦ୍ୟୁତ୍ ନାହିଁ । ଯଦି ଉତ୍ତର କୋରିଆ ସ୍ୱୀକାର କରେ ଯେ ସଂକ୍ରମଣ ସେଠାରେ ଅଛି, ତେବେ ଏହା କିମ୍ ଜଙ୍ଗ ଉନ୍ ପାଇଁ ‘ପରାଜୟର’ ସଙ୍କେତ ହେବ ।
