ଯାଜପୁରରେ ହୁତୁ ହୁତୁ ହେଇ ବଢୁଛି କରୋନା ଆକ୍ରାନ୍ତଙ୍କ ସଂଖ୍ୟା, ପଶ୍ଚିମବଙ୍ଗ ଫେରନ୍ତା ବଢ଼ାଇଛି ଚିନ୍ତା…

ରାଜ୍ୟରେ କରୋନା ଆକ୍ରାନ୍ତଙ୍କ ସଂଖ୍ୟା ଦିନକୁ ଦିନ ବଢୁଥିବା ବେଳେ ପୂର୍ବରୁ ଖୋର୍ଦ୍ଧା ଜିଲ୍ଲା ଏବଂ ଏବେ ଯାଜପୁର ଜିଲ୍ଲା ଏହାକୁ ନେଇ ରେକର୍ଡ ଭାଙ୍ଗିଛି । ଭୁବନେଶ୍ୱର ରେ କରୋନା ସ୍ଥିତି କିଛି ମାତ୍ରାରେ ଥମି ଥିବା ବେଳେ ବର୍ତ୍ତମାନ ଯାଜପୁର ଜିଲ୍ଲାରେ ଏହି ଭୂତାଣୁ ହୁତୁ ହୁତୁ ହୋଇ ଲୋକଙ୍କୁ ଗ୍ରାସିବାରେ ଲାଗିଛି । ଆଉ ଏଥିପାଇଁ ମୁଖ୍ୟତଃ ପଶ୍ଚିମବଙ୍ଗ ଫେରନ୍ତାଙ୍କୁ ହିଁ କରୋନା ଭୂତାଣୁ ର ଶିକାର ହେଉଥିବା ସରକାରୀ ସୂତ୍ରରୁ ସୂଚନା ମିଳିଛି ।

ଆଜି ଗୋଟିଏ ଦିନରେ ଯାଜପୁର ଜିଲ୍ଲାରେ 7 କରୋନା ପଜିଟିଭ ଚିହ୍ନଟ ହୋଇଛନ୍ତି । ସକାଳେ 5ଟି କେଶ ବାହାରିଥିବା ବେଳେ ଆଜି ଅପରାହ୍ନ ରେ ଆହୁରି 2ଟି ନୂଆ ପଜିଟିଭ କେଶ ବାହାରିଛି । ଆଉ ଯାଞ୍ଚ ବେଳେ ସମସ୍ତ ଆକ୍ରାନ୍ତ କୋଲକାତାରୁ ଫେରିଥିବା ସ୍ୱାସ୍ଥ୍ୟ ବିଭାଗ ସୂଚନା ଦେଇଛି । ଯାହା ଏବେ ଓଡ଼ିଶା ସରକାରଙ୍କ ଚିନ୍ତା ବଢ଼ାଇଛି । ଏବେ ଯାଜପୁରରେ କରୋନା ଆକ୍ରାନ୍ତଙ୍କ ସଂଖ୍ୟା 47ରେ ପହଁଚିଥିବା ବେଳେ ରାଜ୍ୟରେ ଆକ୍ରାନ୍ତଙ୍କ ସଂଖ୍ୟା 156କୁ ବୃଦ୍ଧି ପାଇଛି ।

ସେପଟେ ପଶ୍ଚିମବଙ୍ଗରୁ ଫେରିଥିବା ଲୋକମାନେ ସେମାନଙ୍କ ଗସ୍ତ ସମ୍ପର୍କରେ ନ ଲୁଚାଇବାକୁ ରାଜ୍ୟ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପରାମର୍ଶ ଦେଇଛି । ସେମାନେ ନମୁନା ପରୀକ୍ଷା ପାଇଁ ଆସିବାକୁ କୁହାଯାଇଛି ।

ପଶ୍ଚିମବଙ୍ଗରୁ ଆସିଥିବା ବ୍ୟକ୍ତିମାନେ ସୁସ୍ଥ ଅନୁଭବ କରୁଥିଲେ ମଧ୍ୟ ସେମାନେ କରୋନା ଦ୍ୱାରା ସଂକ୍ରମଣ ହୋଇ ପାରିଥାନ୍ତି । ଏହାଦ୍ୱାରା ସେମାନେ ଅନ୍ୟମାନଙ୍କୁ ସଂକ୍ରମିତ କରିବାର ଆଶଙ୍କା ରହିଛି । ତେଣୁ ପଶ୍ଚିମବଙ୍ଗରୁ ଆସିଥିବା ବ୍ୟକ୍ତିମାନେ ହୋମ୍‌ ଆଇସୋଲେସନରେ ରହିବା ସହ ସ୍ଥାନୀୟ ବିଡିଓ, ତହସିଲଦାର କିମ୍ବା ସରପଞ୍ଚଙ୍କ ସହ ଯୋଗାଯୋଗ କରିବାକୁ ପରାମର୍ଶ ଦିଆଯାଇଛି ।

ଏଥିପାଇଁ ସ୍ୱାସ୍ଥ୍ୟ ବିଭାଗର ହେଲ୍‌ପ୍‌ଲାଇନ୍‌ ନମ୍ବର ୧୦୪, ୨୪ ଘଣ୍ଟା ଖୋଲା ରହିଛି । ଯଦି ସେମାନଙ୍କଠାରେ ଥଣ୍ଡା ଓ କାଶର ଲକ୍ଷଣ ଅନୁଭୂତ ହେଉଥାଏ ତେବେ ଡାକ୍ତରୀ ପରାମର୍ଶ ପାଇଁ ୧୦୪ ନମ୍ବରରେ ଯୋଗାଯୋଗ କରିବାକୁ ପରାମର୍ଶ ଦିଆଯାଇଛି ।

ଏପଟେ ଯାଜପୁରରେ ଗତକାଲି ଆଉ ଜଣେ କରୋନା ପଜିଟିଭ ଚିହ୍ନଟ ହୋଇଥିଲା । ତାଙ୍କ ଘର ଯାଜପୁର ଜିଲ୍ଲା ବାସୁଦେବପୁର ଅଞ୍ଚଳରେ । ପୂର୍ବରୁ ଏହି ଅଞ୍ଚଳକୁ କଣ୍ଟେନମେଣ୍ଟ ଘୋଷଣା କରାଯାଇଥିଲା । ସେହିଦିନ ଦିନକରେ ୪ କରୋନା ଆକ୍ରାନ୍ତ କେବଳ ଯାଜପୁରରେ ଚିହ୍ନଟ ହୋଇଥିଲା । ଏହି ସମସ୍ତ ବ୍ୟକ୍ତି କୋଲକାତାରୁ ଫେରିଥିଲେ ।

ଏହାର ଗୋଟେ ଦିନ ପୂର୍ବରୁ ଯାଜପୁରରେ 3 କରୋନା ପଜିଟିଭ୍‌ ଚିହ୍ନଟ ହୋଇଥିଲା । ସେମାନେ ମଧ୍ୟ କୋଲକାତାରୁ ଫେରିଥିଲେ । ସେତେବେଳେ ଯାଜପୁରରେ କରୋନା ଆକ୍ରାନ୍ତ ଚିହ୍ନଟ ସଂଖ୍ୟା ୩୯ ଛୁଇଁଥିଲା ।